Read This Page In:
Ilungelo Lentando Yeningi Namandla Okuvota ENingizimu Afrika
Intando yeningi eNingizimu Afrika ayilona nje uhlelo lukahulumeni; iletha ithemba, ukulingana, nobumbano kubantu
okubenza bakhulume izwi linye. Uhambo lwentando yeningi eNingizimu Afrika belulokhu lunzima, njengoba kube
nenqwaba yabantu abalwe nobandlululo. Ilungelo lokuvota, eliyingxenye ebalulekile yentando yeningi, lalenqatshelwe
kubantu abaningi baseNingizimu Afrika ngaphansi kobandlululo. Ngenxa yalokho, ukuvota namuhla akuyona nje into
engasho lutho, kodwa kuyindlela yokuhlonipha umzabalazo walabo bantu.
Umlando Wentando Yeningi ENingizimu Afrika
Intando yeningi eNingizimu Afrika inomlando ophawuleka ngezenzo zokuphikisa, ukuzidela, kanye nempumelelo.
Kwaze kwaba ngo-1994, lapho ubandlululo luphela futhi uNelson Mandela eba umongameli wokuqala omnyama,
lapho intando yeningi yaqala khona ukubonakala.
Kungani Wonke Amavoti Ebalulekile
Ukuvota kuyindlela abantu abathinta ngayo izinqumo zikahulumeni nekusasa lezwe. ENingizimu Afrika, lapho
amalungelo okuvota atholakala kanzima, ivoti ngalinye liyindlela yokuhlonipha inkululeko kanye nokulungisa
imiphumelela yokungabi nabulungiswa kwangesikhathi esidlule. Kodwa imibiko yakamuva ibonisa ukuthi abantu
abaningi bakhetha ukungavoti. Lokhu kuyakhathaza ngoba kusho ukuthi uhulumeni angase angenzi ngempela lokho
okuyintando yabaningi. Akufanele umuntu athi ngeke avote kulokhu; abaningi balilwela futhi balifela leli lungelo,
kufanele lihlonishwe. Uma abantu baseNingizimu Afrika befuna uguquko, kumele bavote. Ivoti ngalinye akulona nje
elomuntu yedwa, kodwa licija ikusasa lezwe.
Imfihlo Yevoti Lakho
Embusweni wentando yeningi, imfihlo yevoti ibalulekile. Ivoti lakho liyimfihlo, futhi akekho owaziyo ukuthi uvotele
bani. Le mfihlo ivikela inkululeko yomuntu ngamunye kanye nenqubo yentando yeningi. Ivumela wonke umuntu
ukuba avote ngaphandle kokwesaba noma ingcindezi, okuqinisekisa ukuthi amazwi abantu abaluleka
ngokulinganayo.
Uhlelo Lokuvotela Olukathathu Okhethweni Lwango-2024
Ukhetho lwango-2024 eNingizimu Afrika lwethula uhlelo olusha lokuvota kathathu:
1. Ivoti Likazwelonke: Votela iqembu lezepolitiki lePhalamende Likazwelonke.
2. Ivoti Lesifunda: Khetha amaqembu ezepolitiki noma abakhakhansi abazimele esifundeni sakho abazongena
ePhalamende Likazwelonke.
3. Ivoti Lesifundazwe: Votela amaqembu ezepolitiki noma abakhankasi abazimele abazongena
esishayamthetho sesifundazwe.
Lolu hlelo lunikeza abantu abavotayo amandla athe xaxa futhi lunanabakhankansi abazimele ngelekeqe, okwenza
babe baningi abantu okungakhethwa kubo, okuyinto eqinisa inqubo yentando yeningi.
Isiphetho: Ivoti Lakho, Izwi Lakho
Namuhla, ukuvota eNingizimu Afrika kuyindlela enamandla yokuveza lokho umuntu ngamunye akufunayo nalokho
okufunwa abantu behlangene. Ukuvota kuyindlela yokukhulumisana phakathi kwezakhamizi nohulumeni, okubumba
isikhathi samanje nekusasa. Njengoba abantu baseNingizimu Afrika bevota, basuke behlonipha labo abalwela leli
lungelo futhi bazibophezela ekubumbeni intando yabo yeningi. Wonke amavoti mawabe yizwi lethemba, izinguquko,
namandla esizwe.